Smurostar með íslensku grænmeti
Það er gaman að sjá þegar íslenskir framleiðendur taka höndum saman og búa til nýjar og spennandi vörur úr sameiginlegri framleiðslu. Ostahúsið og Sölufélag garðyrkjumanna eru þessa dagana að setja á markað smurosta úr íslensku grænmeti; papriku og sveppum.
Hlutfall af grænmeti í nýja smurostinum er um 20%. Engum öðrum bragðefnum er bætt í ostinn þannig að hann tekur bragð eingöngu af grænmetinu, annars vegar af papriku og hins vegar af sveppum.
Smurostur með íslensku grænmeti er nýjung á markaði. Það hefur ekki verið reynt áður að blanda saman fersku grænmeti og osti.
Tenglar:
Ostahúsið
Matvara // 26/10/2011
Björg í bú
Björg í bú er hönnunarstofa þriggja vöruhönnuða Eddu Gylfadóttur, Guðrúnar Hjörleifsdóttur og Helgu Björgu Jónasardóttur.
Björg í bú leggur áherslu á íslenska framleiðslu í hönnun sinni og kappkostar að nýta þá möguleika sem finnast hjá íslenskum framleiðslufyrirtækjum.
Matarhönnun og almenn vöruhönnun eru helstu viðfangsefni auk annarra skapandi verkefna og viðburða.
Örflögur
Örflögur eru hollar, fitulausar kartöfluflögur. Bakaðar og þurrkaðar kryddaðar með sjónum, hrein náttúruafurð.
Askjan sem örflögurnar eru í breytist í skál þegar hún er opnuð og geymir þar fróðleik um kartöfluna og uppruna hennar.
Örflögur eru hannaðar í samvinnu við Innovit, nýsköpunar- og frumkvöðlasetur og Matís, styrkt af Rannsóknamiðstöð Íslands, Rannís.
Blómasegull
Blómasegull er veggplatti úr eik með innbyggðum seglum. T.d. er hægt að nota hann í eldhúsi sem hnífasegul eða forstofu sem lykla segul. Fæst í Kirsuberjatrénu Vesturgötu og Hrím Akureyri
Kjötbretti
Kjötbretti er fyrir sunnudagssteikina en raufar í brettinu taka við safanum. Það getur skipt miklu máli að hluta steikina rétt niður og hver man ekki eftir skýringarmyndinni fyrir ofan kjötborðið hjá kaupmanninum á horninu.
Kjötbrettið frá Björg í bú er úr gegnheilu beykilímtré og er framleitt á Íslandi. Fæst í Kirsuberjatrénu Vesturgötu, Epal Skeifunni og Mýrin í Kringlunni
Peysuleysi
Peysuleysi er fjölnota flík sem hægt er að nota á ótal mismunandi vegu. Hægt er að nota hana sem sjal, bolero, ermar, vesti, buxur, kraga, hettu, húfu, peysu og ótal margt annað sem þér gæti dottið í hug. Peysuleysi er fáanlegt í 7 litum, svörtu, hærusvörtu, hvítu, gráu, bláu, brúnu og rauðu. Peysuleysi er framleidd á Íslandi og er úr 100% ull. Fæst í Kirsuberjatrénu Vesturgötu, Kraum Aðalstræti, Textíll, Lokastíg 28 og Hrím, Akureyri
Ýmsar aðrar skemmtilegar vörur má finna á vefnum þeirra; bjorgibu.wordpress.com
Vinnustofa:
Björg í bú
Vesturgata 12
101 Reykjavík
bjorgibu@gmail.com
Fatnaður, Gjafavara, Matvara, Nytjahlutir // 26/10/2011
Holt og heiðar
Holt og heiðar ehf. vinnur birkisíróp og afurðir unnar úr rabarbara á Hallormsstað. Helsta sérstaða fyrirtækisins er framleiðsla birkisíróps en það er hvergi annarstaðar framleitt á Íslandi. Birkisíróp er gott í drykki bæði kalda og heita, á vöfflur, útá morgunkornið, til marineringar og margt fleira.
Rabarbarasultan sem Holt og heiðar ehf. framleiða inniheldur engin rotvarnarefni heldur aðeins rabarbara, sykur og fjallagrös.
Birkisírópið og rabarbarasultan eru komin í sölu vítt og breitt um landið og hafa viðtökur verið mjög góðar.
Holt og heiðar selja einnig þurrkaða furu- og lerkisveppi sem eru ómissandi í sósugerðina, sem og köngla af broddfuru, stafafuru, sveigfuru, fjallafuru, skógarfuru, rauðgreni, sitkagreni, elri, lerki og fjallaþallarkönglar. Könglarnir fást í verslunum Blómavals.
Umfjöllun á austur.is
Vefsíða: http://www.holtogheidar.is/
Matvara, Nytjahlutir // 26/10/2011
Geiturnar þrjár
Sé miðað við hina góðkunnu höfðatölu slá Íslendingar sennilega öll met í bókaútgáfu. Við erum mjög heppin að hér eru prentsmiðjur með gæði á heimsmælikvarða og nær allur hluti framleiðslunnar getur farið fram hér á landi, fyrir utan að hráefnið, pappírinn, er innfluttur.
Hér er lítið dæmi um bók sem er skrifuð, teiknuð og framleidd hér á landi. Sagan um Geiturnar þrjár er upprunalega norsk en komin í glænýjan og alíslenskan búning.
Hún fæst í öllum helstu bókabúðum út um allt land. Eymundsson, Hagkaup, Office 1, A4, Iðu, Mál og menningu, Bókabúðin Hraunborg, Bóksölu stúdenta, Úlfarsfelli.
By Hjördís
Hjördís Ýr Ólafsdóttir er íslenskur vöruhönnuður sem hefur stundað nám á Ítalíu og í Ástralíu sl ár en starfar nú á Íslandi. Hún fékk þá hugmynd að búa til snaga handa krökkum, eftir að hún hafði leitað lengi að skemmtilegum og fallegum snaga fyrir sín eigin börn en ekki fundið.
Allar vörurnar eru framleiddar á Íslandi, snagarnir eru gerðir á tveimur stöðum á landinu og pakkningar pantaðar annarsstaðar frá. Þessar skemmtilegu vörur munu fást með haustinu á Íslandi og í verslunum og á mörkuðum í Ástralíu.
Verslanir: Epal, Mýrin Kringlunni, Hrím
Vefsíða: www.byhjordis.com
Gjafavara, Nytjahlutir // 15/08/2011
Íslensk hollusta
(áður Hollusta úr hafinu) er félag sem Eyjólfur Friðgeirsson líffræðingur stofnaði árið 2005 til að þróa og framleiða hollustufæði. Eyjólfur fer ótroðnar slóðir í framleiðslunni. Engum hafði til dæmis dottið í hug áður að rista beltisþara og hafa sem snakk, nota birki, fjallagrös og ætihvönn í osta, stefna saman rabarbara og ætihvönn í mauki (chutney) eða blanda saman muldum Hekluvikri og jarðsalti úr borholu á Reykjanesi til að gera hollustuefni fyrir baðvatn! Leiðarljós Eyjólfs er að nota hrein íslensk náttúruefni og láta þau njóta sín í eigin ferskleika og einfaldleika.
Vöruframboð Íslenskrar hollustu er fjölbreytt og meðal annars má nefna:
Krydd, sósur, baðvörur, jurtate, snakk, rjómaostar, berjasaft, heilsudrykkir, húðvörur, kryddlegin söl
Hann safnar hráefninu í vörurnar hérlendis og beinir með starfi sínu athygli að því að í náttúran sjálft er meiri matarkista en margur hyggur og stuðlar jafnframt að því að endurvekja þjóðlega íslenska matargerð.
Þari er til dæmis stór þáttur í matarmenningu fólks í Austurlöndum fjær, hvers vegna skyldu ekki Íslendingar notfæra sér þennan holla og gómsæta sjávargróður eða sækja sér fjallagrös og hvönn til að krydda matinn og tilveruna?
Vefur: www.islenskhollusta.is
Vörurnar fást m.a. á natturan.is
Gjafavara, Matvara, Snyrtivörur // 23/06/2011
Arfleifð
Ágústa Arnardóttir skóhönnuður hannar og framleiðir fatnað og fylgihluti undir vörumerkinu Arfleifð. Hún notar eingöngu íslenskt hráefni s.s. hreindýra-, sel- og lambaleður, roð af þorski, lax, karfa og hlýra. Aukahlutir eru bein, horn, hrosshár og ull, þæfð eða prjónuð. Náttúrulegt form hráefnisins veitir henni innblástur og vörurnar eru að mestu leyti hannaðar út frá því. Hver einasta vara er handunnin af hönnuðinum sjálfum og er því einstakt listaverk í raun.
Í vörulínunni frá Arfleifð má m.a. finna töskur, kjóla, vesti, armbönd og hárskraut.
Skoðið nánar:
Fatnaður, Gjafavara, Nytjahlutir // 12/06/2011
Raven Design
Hulda og Hrafn reka lítið handverkshús og framleiða skart og nytjahluti undir merkjum Raven Design. Sjálf segjast þau fá “innblástur úr einstakri lögun eyjarinnar, styrk og eldvirkni. Ekki má gleyma krafti fossana og leyndardóma hraunsins eins langt og augað eygir.”
Vefur: ravendesign.is
Facebook
Gjafavara, Nytjahlutir // 23/02/2011
Kátir kroppar
Kominn er á markað íslenskur barnamatur, fyrstur sinnar tegundar hér á landi. Um er að ræða maukað grænmeti undir vörumerkinu Kátir Kroppar. Maukið er einungis úr íslensku hráefni, ræktað á vistvænan hátt í hreinni náttúru landsins. Það er án viðbætts sykur og án allra aukaefna.
Frumkvöðlarnir eru Guðrún Stefánsdóttir, hjúkrunarfræðingur á Barnaspítala hringsins og Þórdís Jóhannsdóttir meistaranemi í iðnaðarverkfræði. Hugmyndin spratt upp þegar Þórdís var með hugann að þeim fjölmörgu nýsköpunar- og frumkvöðlaverkefnum sem hún vann að í námi sínu. Á meðan var Guðrún í fæðingarorlofi þar sem stór hluti dagsins fór í það að gefa yngri syni sínum barnamat að borða. Þær höfðu verið að þróa hugmyndina í kollinum, hvor í sínu lagi.
Samstarf náðist við “Í einum grænum”, dótturfélag Sölufélags garðyrkjumanna sem annast framleiðsluna.
Lagður er mikill metnaður í að bjóða upp á hágæða barnamat, framleiddan með öflugum tækjabúnaði þar sem hreinlæti og gæði eru í fyrirrúmi.
Frá Kátir kroppar fást, til að byrja með, fjórir vöruflokkar:
- Gulrætur og steinselja. 180 g dós.
- Spergilkál og blómkál. 180 g dós.
- Gulrætur. 4*100 g í magnpakkningu.
- Rófur. 4*100 g í magnpakkningu.
Barnamaturinn fæst í Fjarðakaupum og ýmsum öðrum verslunum.
Vefur: www.katirkroppar.is
Facebook síða
Ættarhringur
Ættfræðiáhugi Íslendinga hefur löngum verið mikill. Ættarhringurinn er skemmtileg og falleg nýjung fyrir þá sem vilja flagga forfeðrum sínum uppi á vegg. Ættarhringinn er líka hægt að fá í smærri útfærslu með færri ættliðum sem kort eða sem veggmynd. Skemmtileg vöggugjöf eða skírnargjöf.
Það er Albert Eiríksson sem bjó til þessa skemmtilegu lausn.
Vefur: www.aettarhringur.is
